Шрифт түри: Шрифт көлеми: Әлипбе:

САЛЫҚ (SALIQ)

Былтырғыдан быйыл жаман,
Қалай-қалай болды заман,
Ғәрийп-қәсер қалмай аман,
Он тилладан келди салық.

Буны салды Нурымбет жан,
Буйырды деп аталық хан,
Халық поссын деп неше сан.
Он тилладан келди садық.

Маған ҳеш гәп ешегим бар.
Сатып беремен бир базар.
Әттен жарлы аш Ерназар,
Оған қыйын болды салық.

Ол пақырдық нәрсеси жоқ,
Емес тағы қарны тоқ,
Ҳадалға бир таўығы жоқ,
Албыратты оны салық.

Үйинде бар жетим баллар,
Тамақ, нан деп зар жылар,
Көзден ағып қанлы жаслар,
Жүдә қыйын болды салық.

Мөр услаған Бәҳәўатдийин.
Бизлерде жоқ қара тийин,
Гилең ашқа болды қыйын,
Жүдә аўыр келди садық

Анаў жатқан Палым лаққы,
Оның журтта барма ҳаққы?
Берер едим оған заққы,
Ҳал дәрманды қуртты салық.

Анаў жүрген Елмурат,
Астында жаман ала ат,
Оған не деген салтанат,
Киси қаны болды салық.

Өндиреди аш халықтан,
Жетим жылайды сонлықтан,
Бай аман қалды салықтан,
Дөҳмет болды төлеў салық.

Анаў отыр Қулымбет бай.
Таяр алдында аппақ май,
Ал халықлар жүр табалмай жай,
Дөҳмет болды усы салық.

Анаў мешит мунарланған,
Басларында шырақ жанған.
Қуран ашып халықты сорған,
Ийшанларға жоқдур салық.

Ақ үзикли үлкен отаў,
Өз алдында болып атаў,
Ерман ахун отыр анаў,
Оғандағы жоқдур салық.

Анаў жүрген Пирим шолақ,
Етип жүр ол жалақ-жулақ,
Салық десе таяр ол-ақ,
Бизлер ушын қыйын салық.

Ўақтым өтти қайғы менен,
Жас айрылмай көзим сеннен,
Сорасаңыз буны меннен,
Усылайынша болды салық.



Гезектеги ендиги бөлимге өтиў: БЫЙЫЛ
Алдынғы бөлимге қайтыў: ЖАҚСЫРАҚ
Китап Мазмунына қайтыў

Социал тармақларда бөлисиў

Егер сиз бул китаптың усы бөлимин унатқан болсаңыз, бул бетти төмендеги социал тармақлар арқалы досларыңыз бенен бөлисиўди умытпаң:

Қәте болған текст:
Дурысланғаны:
    Дурысланған текст серверге жиберилмекте...
Өзгерисиңиз қабыл етилди. Үлес қосқаныңыз ушын рахмет!
Кеширерсиз, серверде қандайдыр қәте жүз берди. Азмастан, және бир урынып көриң.